ಅವರವರ ಆಕಾಶ

ನನ್ನ ಆಗಸವೆಂದರೆ
ಅದೂ ಇದೂ
ಮೋಡ ಮತ್ತಿನ್ನೊಂದು
ತಾರೆಗಳು ಕೈ ಕುಲುಕಿದ್ದು
ಅಷ್ಟೇ ಅಲ್ಲ

ರವಿಯ ಅಪಾಪೋಲಿತನದಿಂದ
ಪೇಲವವಾದಳು ಇಳೆ
ಅವ ಕೂಡಾ ನಾಚಿ ಕೆಂಪಾಗಿ
ಸರ್ರೆಂದು ಜಾರಿದಾಗ
ನನ್ನ ಮೋರೆಯೂ ರಾಗ ರಂಜಿತ

ಬಿಳಿಯರಳೆ ಗರ್ಭ ಧರಿಸಿ
ಮಂದ ಗಮನೆಯಾಗಿ
ಪ್ರಸವವೆಂದು ಭೋರಿಟ್ಟಾಗ
ವರ್ಷಧಾರೆ ಸಹ್ಯಾದ್ರಿಯ ಸೆರಗಿಗೆ
ಹನಿ ತಂಪು ಎನ್ನ ತನುವಿಗೆ

ನಭದ ವಿಸ್ತಾರಕೆ ಅಂಕಿತವೋ
ಅಗಸದ ಗಲ್ಲಕೆ ದೃಷ್ಟಿ ಬೊಟ್ಟೋ
ರಚ್ಚೆ ಹಿಡಿದ ಕಂದನ ಕೈಯಲಿ
ನಿಹಾರಿಕೆಯ ಆಟಿಗೆಯೋ

ಯಾವ ಭಾವದ ವ್ಯಾಪ್ತಿ
ಯಾರ ನಿಯೋಜನೆಯ
ಆಣತಿ ,ನಿರಂತರ ಅಲೆಗಳಿಗೆ
ನಿಯಮಿತ ಕಕ್ಷೆ

ಬಣ್ಣವೆರಚಿ ಪೊರಕೆ ಬಾಲ
ತೋರಿ ಹೊದಿಸಬಹುದೇ
ಮನದ ತುಂಬಾ ಹೊನ್ನಿನ
ಚಿತ್ತಾರಗಳ ಕೌದಿಯ